30 ألف حسبي الله ونعم الوكيل

حكاية السكرين اللي تحت و الرسالة اللي في البوست اللي فات ..
بنوتة جميلة و بنت ناس كانت مخطوبة و قررت جنب شغلها تشتغل اون لاين .. و المجال ده كان محتاج منها تعرف ناس يساعدوها في حوار البيدجات و الإعلانات و الكلام ده .. و ده كان مجاله و كان بيساعدها في شغل الاون لاين و مع بعض سنين شغالين ..
و في عز ما هي شغالة و أمورها تمام .. تحصل تصرفات ذكورية من خطيبها تكون نتيجتها فسخ الخطوبة ،،
 غصب عنها في الفترة دي و هي بتمر بأزمة نفسية كانت بتحكي لكل اصحابها بما فيهم الشخص ده عن قد ايه هي مصدومة و موجوعة و محتاجة وقت تتعافى من التجربة دي عشان للاسف هي شخصية حساسة و الخذلان و الوجع بيبقا جواها أضعاف اي حد طبيعي ..
في الفترة دي قرر النحنوح انه يدخل حياتها .. ده ميستاهلكيش و كويس انه مشي .. عشان انا بحبك و من زمان بس مكنتش قادر اعترف لك الفترة اللي فاتت لكن دلوقت انا جاهز و مش داخل العب و لا اتسلى .. انا هدخل من الباب و هخطبك علطول ..
صاحبتي كان مر على فسخ خطوبتها شهور و مكانتش لسا متزنة بشكل كافي عشان تحكم على مشاعرها ..
و كانت زي الغريق اللي بيتعلق بقشة ..
هو قالها بحبك من هنا و هي اتعلقت بيه و شافت فيه كل المميزات اللي كانت مفتقداها في اللي قبله .. قعدوا شهر يتكلموا .. لحد ما طلبت منه انهم يتقابلوا قبل ما يتقدملها عشان يحطوا النقط ع الحروف و يبقا متأكد من مشاعره و قراره مليون في المية قبل الخطوة دي .. لان أهلها من الناس بتوع زمان ،، ناس شديدة و عندهم مبادئ و أصول و حوار علاقات و معارف النت دي مش بيتقبلوها لازم يبقوا عارفين الناس اللي هيتقدموا و اصلهم و الحاجات دي خصوصا انهم من بلد شبه ارياف و انتوا عارفين الناس هناك بتفكر ازاي ..
اتقابلوا .. و كانت مقابلة جميلة عززت مشاعرهم و قرارهم بالارتباط .. و برضه عشان هي عارفة أهلها قالت له عن نفسي انا موافقة و مقتنعه بيك ١٠٠% بس انت خد وقتك و متستعجلش قرار دخول البيت و صلي استخارة اكتر من مرة و الموضوع مفيش فيه اي حرج طالما بعيد عن اهلي و لسا بيني و بينك ..
قالها لو كنت متمسك بيكي قيراط ، بعد المقابلة دي بقيت متمسك بيكي ٢٤ قيراط ،. انا مش هلاقي احسن منك تبقى ام أولادي.. مش هتمنى لنفسي نسب و لا أدب و لا احترام و لا اخلاق و طباع احسن من كده .. انتي حتى كتيرة عليا ..
صاحبتي كانت طايرة من الفرح .. و قالت خلاص ده عوض ربنا عن كل اللي شفته في الخطوبة اللي فاتت ..
اتصل بيها و قالها عايز رقم والدك عشان اخد منه موعد اجي أتقدم لك فيه ..
خد الرقم و اتصل على والدها و قاله انه شافها في الشغل و أعجب بيها و حابب يدخل البيت من بابه .. و بعتله كل بياناته و طلب منه يسأل عنهم كويس عشان هما من محافظة تانية ..
الاب سأل كويس و سمع عنهم كل خير و عرف ان الاب متوفي و هو و اخواته متحملين المسئولية بعده ف اطمن و اتفائل انه هيكون راجل مسئول و محترم و بعد اسبوع اتصل الوالد و حدد له موعد يتقدم فيه هو و أهله..
صاحبتي اليوم ده كنت اول مرة في حياتي من يوم ما عرفتها اشوفها فرحانة كده .. كانت بتبعتلي اللبس اللي هتقابله بيه عنيها و فرحتها كانت هي اللي مخليه كل حاجة فيها حلوة ..
الاب لما شاف تمسك الولد و لهفته على الارتباط ببنته .. فرح و اتصل ع الاعمام و الاخوال و فيه عريس جاي لبنتي و اتمنى تشرفونا ،،
و الام وقفت من الصبح عملت احلى أصناف اكل ..
وليمة تكفي قبيلة .. و كأنه فرح مش مجرد حد جاي يتقدم و ده لأنهم بيت كرم و الضيف عندهم لازم ياخد واجبه كامل مكمل .. ما بالكم بقا بعريس جاي من سفر هو وأهله..
العريس وصل معاه امه و اخته و اخوه الكبير ..
الام بقت كل شوية تحضن صاحبتي و تقولها انا مش مصدقة انك هتبقي مرات ابني .. مرات ابني انا بالحلاوة و الجمال ده ..
الأخت تقولها انا عمري ما ارتحت لحد زي ما ارتحت لك و اكيد انا و انتي هنبقا أصحاب بعيد عن اخويا اصلا ..
صاحبتي اطمنت اكتر و اكتر .. مش هو بس اللي بيحبني ده اهله كمان حبوني و فرحانين بيا و اول ما بدأوا يسألوا عن التفاصيل و طلبات الاهل ..
الاب قالهم مادام هنشتري راجل مش هنختلف في حاجة ان شاء الله ،،
الاسبوع الجاي تبقا قعدة الاتفاقات نتكلم في كل التفاصيل .. و نقرأ الفاتحة ..
قالوا خلاص على خير ان شاء الله ..
مشيوا خلاص و صاحبتي و أهلها بدأوا يستعدوا لقراية الفاتحة و يعزموا باقي الاهل و المقربين ..
و الولد قعد يكلمها اليوم ده للصبح و هو مش مصدق نفسه من الفرحة و اخيرا الحلم قرب يتحقق ..
عدى يوم اتنين تلاته .. بدأت المكالمات تقل ..
مالك خير ؟ معلش اصل عندي شوية مشاكل في الشغل .. طيب ان شاء الله كل حاجة تعدي ..
خلاص موعد قراية الفاتحة بعد بكرا ..
تليفونه مقفول ..
كلمت اخته .. لا هو كويس متقلقيش بس نفسيته تعبانة شوية عشان مشاكل الشغل ..
ليلة قراية الفاتحة .. تليفونه مفتوح بس مبيردش ..
طيب المفروض حد يكلم بابا او حتى الام تكلم امها يأكدوا ع الموعد بكرا .. محدش اتصل ..
اتصلت هي على امه لقتها بتكلمها رسمي مش الام اللي قابلتها في البيت ابدا و قالت لها معرفش اي حاجة هوصل لابني و ارجعلك .. و اختفت ..
اتصلت ع الأخت.. قالتلها مش عارفة هو ماله مكتئب و قافل على نفسه عشان خسر خسارة كبيرة في الشغل ..
قالت مفيش مشكلة متجوش خالص لو مش مستعدين بس حد يتصل على بابا يعتذر و يأجل الموعد ..
حاضر هكلمه اهو و اختفت ..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى