حسبي الله ونعم الوكيل الجزء الثاني

الدقيقة بتعدي تقيلة اوي .. الدقيقة بتعدي يوم مش ساعه ..
و هي كل شوية تتصل عايزة حد بس يكلم ابوها يعتذر عن الموعد ..
اتصلت تاني على اخته و قالت لها خلي اخوكي الكبير طيب يتصل على بابا يعتذر .. او مامتك تكلم ماما .. متخلوش شكلي وحش قدامهم دول قاعدين مستغربين ازاي لحد النهاردة محدش اتصل ..
قالت لها حاضر هيكلمه اكيد يعتذر هو احنا منعرفش الأصول و لا ايه .. ده أقل حاجة المكالمة دي .. النهاردة اكيد اخويا الكبير هيكلمه يعتذر و نأجل الموعد ..
ساعتين تلاته اربعه محدش اتصل ..
صاحبتي قالت لأهلها اعتذروا من الناس اللي انتوا عازمينهم بكرا ، لأنه الولد حصل معاه ظرف صعب و مش هيقدر يجي و محتاج يأجل الموعد فترة ..
ابوها قالها و هو مش خد الموعد ده من راجل ! ميتصلش على الراجل ده ليه لو حصل تغيير !
قالت له معلش اصل الظرف اللي هما فيه صعب و محرجين يكلموك ف قالوا لي ابلغك ..
الاب محبش شكل الموضوع بس التمس لهم العذر يمكن فعلا الظروف مش سامحة .. و سكتوا .. و اعتذروا للناس ..
طيب هما هيأجلوا لحد امتى ؟ لا مش عارفين ..
جه يوم قراية الفاتحة و قعدت تتصل بيه كتير اوي عشان تحاول تفهم فيه ايه ..
رد اخيرا و قالها انا كنت داخل تجارة ب ٣ مليون جنيه و خسرتهم كلهم و حرفيا مبقاش معايا في جيبي جنيه واحد اقدر اتجوزك بيه ..
و عشان اعوض الخسارة دي أقل حاجة ٦ شهور ..
قالت له و لا يهمك محدش من اهلي هيضغط عليك في حاجة و خد وقتك ٦ شهور او سنة .. اهم حاجة بس تتصل تكلم بابا تعتذر له و تشرح له الوضع و بابا متفاهم و مش هيضايقك بالعكس ده ممكن يقف جنبك و يساعدك كمان لحد ما تقف على رجلك ..
اه اكيد هكلمه .. هقفل منك و اتصل عليه .. و انا بحبك و متمسك بيكي و عمري ما هسيبك ادعيلي بس الظروف دي تعدي و ربنا يجمعنا مع بعض على خير ..
و قفل تليفونه و اختفى بالايام ..
اتصلت ع الأخت و قالت لها ارجوكم حد من البيت عندكم يتصل على بابا يقوله اي حاجة ..
خلي اخوكي الكبير يتصل حتى و يقوله كل شيء قسمة و نصيب و خلاص مفيهاش حاجة.. بعد ما جيتوا لقيتونا مش مناسبين و غيرتوا رايكم بتحصل عادي و مفيهاش اي احراج والله .. بس خلوها تنتهي باحترام انا مبقيتش عارفة أوري وشي لحد من اهلي ..
ايه يا بنتي متقوليش كده هو احنا نلاقي زيكم أبدا .. حاضر اخويا هيكلمه النهاردة ..
و اختفت الأخت و بطلت ترد ع التليفون ..
صاحبتي تغيب شوية و ترجع تتصل يا اما محدش يرد و لو ردوا يقولوا لها حاضر هنكلم والدك و يختفوا ..
عدى شهر على الوضع ده .. ابوها قالها دول مش رجالة و لا ولاد أصول.. لو عندهم ميت مش أقل من مكالمة تليفون .. خلاص الموضوع ده انتهى و لو حد كلمك منهم مترديش ..
ميعرفش يا عيني انها هي اللي بتتصل تتحايل عليهم ينهوا الموضوع بشكل محترم قدام ابوها و أهلها..
خلاص صاحبتي فقدت الأمل و بطلت تتصل .. شوية و لقته عملها بلوكات على كل حاجة .. بقت تراقبه من اكاونت تاني على الفيس بوك .. لقت ناس عمالة تباركله في الكومنتات بعد شهر و نص من الموقف ده ..
اتصلت على اخته سألتها هي الناس دي بتبارك لاخوكي على ايه هو خطب ؟ قالت لها لا مخطبش ده تلاقيهم بيباركوله على موضوعكم ..
شوية و لقت بنت بتكتب له كلام على انها حبيبته و اخيرا حققوا حلم حياتهم ..
اتصلت تاني على اخته و قالت لها انتي عندك بنات و مترضيش يحصل فيهم كده .. و حياة بناتك و غلاوتهم اخوكي خطب و لا لا ؟
قالت لها بصراحة ايوه خطب و ربنا يعوضك خير ..
قفلت معاها من غير كلام كتير .. اصل اي كلام خسارة في ناس واطية لا تعرف الأصول و لا يعرفوا ربنا اصلا ..
هتتكلم تقول ايه .. قفلت الموضوع ..
و شهرين تلاته كان متجوز و عامل فرح كبير و ناشر على صفحته كلام حب و غرام و صورهم و فرحته بحب عمره و هو عارف و متأكد انها بتراقب و بتشوف كل حاجة .. و لكم ان تتخيلوا وجعها و حرقة قلبها ..
ده غير المرضى النفسيين اللي بيحبوا يشمتوا و يلتوا و يعجنوا في المواقف دي و شكلها قدامهم ..
الموضوع عدى عليه سنتين .. و من يومها صاحبتي معدتش يوم واحد إلا و هي بتدعي و تحسبن عليه و لسا قلبها مبردش ..
انا فاكرة السنة اللي فاتت كنت شيرت البوست ده .. و كنت موجوعة اوي عشانها .. و مصدومة من الوجع اللي يخلي واحدة متفرغه في رمضان للحسبنة عليه بس ..
عايزة اقولكم انها عملت المستحيل عشان تطلع عمرة و ربنا كتبهالها الحمد لله عشان قلبها يرتاح و تدعي عليه من قدام الكعبة .. و حصل ..
قبل العمرة اخته اتصلت عليها و قالت لها لو بتدعي على اخويا او علينا سامحيه و سامحينا .. اخويا مشافش خير من بعد اللي عمله معاكي .. قالت لها لا مسامحاه و لا مسامحاكي انتي و اهلك كلهم و خصيمتكم يوم القيامة قدام رب العالمين ..
النهاردة بقا بعتلها الرسالة اللي في نزلتها البوست اللي فات ..
ربع ثقتك في نفسك والله !
هيطلق و يجي يعملها تواريخ مميزة و يصلح اللي عمله .. ما هي بسيطة اهي ! اصل انت دنجوان عصرك اللي مفيش منك .. ترمينا وقت ما تحب و ترجع وقت ما تحب و احنا بس قاعدين مستنيين جمال طلتك !
يا اخي حسبي الله و نعم الوكيل فيك الف مرة .. تعيش بذنبها ان شاء الله العمر كله و مش هتسامحك برضه !
و مش هي لوحدها اللي بتحسبن .. اهو انا و كل حد عرف الموضوع ده هيحسبن عليك انت و اهلك و ربنا يتقبل .. و تبقوا عبرة لأي حد يفكر يكسر بنت و يوجعها بالشكل الحقير ده ..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى